Улуу Кыайыы 80 сылын көрсө “Уруйдуубут Улуу Кыайыыны” нэһилиэктэр икки ардыларыгар ыытыллар фестиваль күрэҕэ Дүпсүн сиригэр олунньу 27 күнүгэр буолан ааста.
1941 сыл бэс ыйын 22 күнүгэр сарсыарда 4 чааска сэрэтиитэ суох фашискай Германия Сэбиэскэй союзка сэриинэн саба түспүтэ. Аҕа дойдуну көмүскүүр сэрии саҕаламмытын туһунан сурах хас биирдии саха ыалыгар этиҥ буолан сааллыбыта. Сэриигэ норуот бүттүүн туруммута. Аҕа дойдуну көмүскүүр сэрии 1418 түүннээх күн салҕанан барбыта. Биһиги оройуоммутуттан сэриигэ 2323 киһи, биһиги нэһилиэктэн 220 киһи бэбиэскэ тутан уоттаах сэриигэ туруммуттара. Хорсун уолаттарбыт Москва, Сталинград, Ленинград куораттар аттыларыттан саҕалаан Берлиҥҥэ, Прагаҕа тиийэ сэриилэспиттэрэ,үлэ фронун ыарахан үлэтин тулуйбуттара. Сэриини 1945 сыллаахха балаҕан ыйыгар Япония кыайыытынан түмүктэспиттэрэ, кыайыы көтөллөөх дойдуларыгар эргиллибиттэрэ быйыл 80 сыла. Харах уулаах ыар сылларга ууну-уоту ортотунан ааспыт, биһиги дьоллоох олохпут иһин хорсуннук турууласпыт биир дойдулаах буойуттарбыт, тыыл үлэһиттэрин сүдү ааттарыгар сүгүрүйэн үйэлээх уот кытыаста кытарда, кинилэргэ махтанан, сүгүрүйэн туран хорсун буойуттарга биир мүнүүтэлээх чуумпу уонна сибэкки дьөрбөтүн уурдулар.
И.Н.Жирков аатынан Дүпсүн орто оскуолатын 3,4 кылаас уолаттара Тимофей Сметанин «Саллаат» диэн хоһоонунан арыйдылар, салайааччылара Протопопова Р.П, Ноговицына Л.П.
- Нартахова Нарыйаана, Соловьева Анита 8 кылаас үөрэнээччилэрэ Дүпсүн нэһилиэгин “Бессмертный материнский подвиг», “Өлбөт полк” хорсун буойуттарын туһунан билиһиннэрдилэр.
-Аҕа Дойду сэриитин кыттыылааҕын, аҕатын Шадрин Гаврил Иосифович туһунан кыыһа Прибылых Варвара Гаврильевна туттубут малларын, кини сырыыларын туһунан олус истиҥник, долгутуулааахтык кэпсээтэ.
Выставканы иилээн-саҕалаан Бээди бөһүөлэгин олохтоох библиотекаря Алексеева А.В. ыытта.
Сырдык, санньыар үөрүүлээх Улуу Кыайыы 80 сыла туругурдун! Куруутун эйэлээх олох баар буоллун! Сүтүктээх, хаан тохтуулаах кырыктаах сэрии аан дойдуга суох буоллун! Ким да умнуллубат! Туох да умнуллубат!
